رساله اليك ابى العزيز

مشتاقة لحضنك يابويا
يابويا وعمى وأخويا
ياصديق الطفوله.....أنا الطفوله
ياأبو الرجوله
==========

مشتاقة لعينيك
مشتاقة لنظرة منك
ولو حتى غصب عنك
مشتاقة لمسكة ايديك
مشتاقة لبسمتك لصرختك وعتابك ليا
أو حتى عقابك ليا
رغم انى بصعب عليا
=============
مشتاقة لحضنك يابويا

مشتاقة لهزارك التقيل
وامثالك اللى ملهاش مثيل
وطيبه قلبك الكبير
وعطفك على الكبير والصغير
وبحبك وعمرى ماهتغير
وافضل فكراك ولا عمرى انساك
ياريتنى كنت اموت فداك
================
مشتاقة لحضنك يابويا

مشتاقة للحظه يعود فيها الزمن بينا
ونتجمع إحنا والعيله وتعود ليالينا
ليالى الفرح والصحبة الحلوة
يارتنى اعرف كنت االف لك ميت غنوة
توصفلك حنينى يابويا
===============
مشتاقة لحضنك يابويا

مشتاقة ليك لما يجيلى عريس
ويطلب منك ايدى
وتعرف اصله كان ايه قليوبى ولا منوفى ولا صعيدى
اكيد هتعرف اذا كان راجل على حق
واكيد فخورة بيك ........فى قولة اه او لأ
=====================
مشتاقة لحضنك يابويا
يابويا وعمى واخويا
ياصديق الطفوله .....انا الطفوله
ياأبو الرجوله
واعرف انى مهما رحت وجيت
لغيرك انت ماهحن ولا حنيت
ولا عمرى بكيت
ولا هشتاق الا ليك
رحمه الله عليك
===============

انا بهدى القصيدة دى لكل واحد وواحدة بيشتاقوا لوالدهم ولكل واحد وواحدة مش مقدرين النعمة اللى فى ايديهم الحقوا ارضيهم وبوسوا ايديهم وتحياتى وسلاماتى ليكم وليهم ==========================

=========================